Psalms 49
Man i tingting long mani na kago tasol, em i longlong man
Dispela song em i bilong ol lain Kora. Em i song bilong man i bosim musik.
1Yupela olgeta manmeri, harim.Yupela olgeta manmeri
i stap long graun,
putim gut yau long tok bilong mi.
2Yupela man i gat nem
na yupela man nating,
yupela maniman
na yupela rabisman,
yupela harim gut dispela tok.
3Bel bilong mi
i gat gutpela tingting tasol.
Olsem na bai mi autim gutpela tok
bilong givim save long yupela.
4Bai mi autim
sampela tok bokis pastaim.
Na bai mi mekim musik long gita
na autim as bilong tok bokis
long yupela.
5Ol a man i ting planti mani
em inap strongim ol,
na ol i save bikmaus nabaut
long ol yet i gat planti samting,
ol dispela man i raunim mi
na i laik bagarapim mi.
Tasol bai mi no ken pret long ol.
7Yumi b save, i no gat wanpela man
i ken baim bek em yet long mani.
Na em i no inap givim mani
long God
inap long baim laip bilong en.
Nogat tru.
8Long c wanem,
pe bilong baim bek man,
em i antap tumas.
Man i no inap baim God
bai God i larim em
i stap laip oltaim
na em i no ken i dai.
10Yumi lukim ol saveman tu,
ol i save dai.
Na ol krankiman
na ol longlong man
ol i save dai.
Ol dispela man bai i lusim
mani samting bilong ol
na bai ol arapela man i kisim.
11Pastaim ol dispela man
i gat graun bilong ol yet,
tasol nau matmat tasol
em i olsem ples
bai ol i stap oltaim oltaim long en.
12Biknem bilong yumi
i no inap pasim yumi long dai.
Nogat.
Yumi bai i dai olsem ol abus tasol.
13Dispela bai i kamap long ol man
i bilip tumas long ol yet
na long ol samting ol i holim.
Kain man olsem
i no gat gutpela tingting.
Ol dispela man i amamas nating
long ol samting ol i kisim,
bai ol i dai olsem.
14God i makim ol
bai ol i dai olsem ol sipsip
na i go long ples
bilong ol man i dai pinis.
Na bai Dai i stap
olsem wasman bilong ol.
Taim ol i lusim pinis
ol gutpela haus bilong ol,
na bodi bilong ol i sting olgeta,
na ol i stap long ples
bilong ol man i dai pinis,
orait ol stretpela man
i ken amamas
long samting i bin kamap
long ol.
15Tasol d bai God i kisim bek mi,
na ples bilong ol man i dai pinis
bai i no gat strong bilong holimpas mi.
16Sapos narapela man
i kisim planti mani samting,
na i wokim bikpela haus
na i gat planti bilas,
maski, yu no ken wari
long dispela.
17Yu e save pinis, bihain em bai i dai,
na em i no inap kisim
wanpela samting i go wantaim em.
Haus na bilas na mani bilong en,
dispela olgeta samting
i no inap i go wantaim em
long ples bilong ol man i dai pinis.
18Taim em i stap laip
em i save amamas
long ol dispela samting.
Em i wok strong
na kisim planti samting,
na ol man i tok,
“Em i gutpela man.”
19Tasol maski, em bai i dai
na i stap wantaim ol tumbuna
long ples ol i no save lukim
lait bilong san gen.
20Biknem bilong yumi
i no inap pasim yumi long dai.
Bai yumi dai olsem ol abus tasol.
Copyright information for
TPI